الشريف بسام بن محمد
ابو سالم قوم اصحا , الدنيا مولعه بره , شو مالك يا ام سالم , مش سامع صوت الانفجارات والطخ , شغال , اعوذ بالله انا قلتلك يا ام سالم من زمان انو العدو مش رايح يسكت في هالاوضاع الي بتصير في الدول العربية وانه الموازين انقلبت ضده , وكان لازم يعمل هجمه استباقيه قبل ما نهجم احنا عليه , شو بدك اتسوي يا ابوسالم , والله يا ام سالم انا بستنى هاظ اليوم من زمان , كان نفسي اموت شهيد على تراب الوطن , ودمي ينزف حتى يرتوي من دم الشهداء , هاظا يوم رد الجميل للوطن , ما انته يا ابوسالم كل يوم بتسب على هالعيشه , مش من قلبي يا ام سالم , الوطن عند الجد اكبر من كل الناس , واغلى من كل الدنيا ,  بسرعه روحي جيبيلي الفرد من درج الخزانه , اليوم البلاد طلبت اهلها , هبت النار والبارود غنى , اطلب شباب يا وطن واتمنى , هاي الفرد يا ابو سالم وهاي الفشك , شوفي يا ام سالم , انا ممكن اطلع وما ارجع , ديري بالك على الاولاد , وربيهم على حب الوطن وعلى الواجب لانهم رايحين يكونوا اولاد شهيد , وبعدين هاي ميه وخمسين ليره كنت شايلهم ليوم عازه ومخبيهم عنك , خذيهم واتصرفي فيهم , واذا استشهدت اكتبي على باب الدار منزل شهيد الوطن ابوسالم , وين سالم خليني اشوفه قبل ما اروح علجبهه , هيو اجا من بره , شو الاخبار يابا يا سالم , والله يا با الدنيا قايمه قاعده , وما بتعرف من وين الرصاص جاي , سمير ابن جيرانا  انطخ ومات , وعنا في الحاره اكثر من عشره جرحى , والمستشفيات مليانه , معلش يا با الوطن بده شهداء والارض عطشانه , شوف يابا انا بوصيك على الوطن وعلى امك واخوانك , خليلك رجل مثل ابوك , وخذ خلي معك هاي الحربه دافع فيها عن امك واخوانك , واي واحد بحاول يفوت الدار  عليكوا ابعطو ولا يهمك يابا يا سالم , طيب انته وين رايح يابا , رايح البي نداء الوطن واسد الدين الي في رقبتي ,  بس الساعه ثلاثه الصبح , الشهاده ما الها وقت هيك علمونا اجدادنا , طيب خليك للصبح وبعدين بتطلع , لا يابا كيف بدي انام والناس قاعده بتموت في الشوارع , هذا يوم العز , طيب اذا بدك الطخ اطلع على السطوح وما حدا بشوفك , انا مش جبان اتخبى على السطوح واليوم اذا ما ذبحت ميه واحد من العدو الغاشم قبل ما استشهد ما بكون ابوك يا سالم , اي عدو يابا الي بتحكي عنو , العدو الي قتل الناس وشردهم , يابا انته فاهم غلط , اليوم طلعت نتائج التوجيهي , والناس الي بطخ عشان هيك , طيب والقتلى والجرحى  والنسوان الي ترملت والاطفال الي ماتت , هاظا كله عشان التوجيهي يابا , والله وطيتوا عقالي يا سالم
يا اسفي عليكوا , فعلا هاظا هو رد الجميل للوطن انا نطخ بعض , يا حيف عليكوا , يا حيف عليكوا.