ناجي الزعبي
 
المفاعل ورانا ورانا من الرمثا لشفا بدران صرنا نحلم باليل بأريفا الشركة الفرنسية التي تواجة تهما بالفساد والمفلسة والمصرة هيئة الطاقة على اعتبارها العراب الحصري لها, والسنكترون السلطي والي محطوط منظر من سنين بلا فايدة و ومفاعل الرمثا الي سرقوا اراضيها وبدهم يكملوها بالاشعاع النووي الي بيسبب السرطان و البلاوي لأهلها   .
 
بحلم  باليورانيوم المخصب والي مش مخصب وعمال المياومة الي مش راضيين يثبتوهم  والمعلمين الي مش راضيين يزيدوهم والمتقاعدين العسكريين الي لسا بدهم يدرسوا مساواتهم وب 2 مليار موازنة وزارة الدفاع وبالسلام الي بشرونا فية بوادي عربة ,  وبالمليارات ال خمسة الي بدها تنصرف على المفاعلات النووية الي العالم بدة يتخلص منها .
 
 بحلم بفقرنا ومديونيتنا وعجز موازنتنا وايدنا الممدودة للمساعدات وبخطر التوطين وتصفية قضية فلسطين على حسابنا . باللة عليكم مين اولى عمال المياومة ولا النووي ؟ نسد ديونا ولا نبني  مفاعلات ؟ نتسلح ولا نبني اقتصاد يطعمينا لقمة بشرف ويمكنا من شراء اسلحة , هذا اذا كنا بنتسلح وليش نتسلح و نشامى القوات المسلحة وأجهزتنا الامنية اهم وافضل واضمن الاسلحة .

بحلم باليل بأريفا الي اعطوها امتياز حصري للتنقيب عن اليورانيوم لعشرين سنة واذا احتجنا يورانيوم لازم نشترية منها ! تصوروا نشتري يورانيومنا من الفرنسيين مثل الي بيبيع دارة وبيستأجرها , وأحالوا شراء مفاعل عليهم مع العلم انة لسا ما تجرب وبدة 5 سنين تا يدخل الخدمة !  سؤال كبيييييييييييييييييير ليش اريفا  ؟

الاشعاع بيهدد الرمثا مدينتي لان المفاعل فيها و سكان شفا بدران وأنا منهم لأنم بنوا مستودعات للنفايات النووية فيها واللة يستر ما تكون شحنة النفايات الي ما رضيوا ان يشرف عليها حدا تكون نفايات الجيران   ( طبعا عارفين مين الجيران ) ويا خوفي يكون هو سبب الاصرار على المشروع حتى يحصل جيرانا على الطاقة والخطر علينا  . يعني بتصدقوا انة جيرانا بسكتوا لو ما الهم مصلحة مهم قاموا الدنيا على ايران اشمعنا ساكتين عنا ؟.
 
 سايق عليكوا اللة تفكونا من المفاعلات والنووي . اليابانيين والالمان قرروا  يخلصوا من المفاعلات  والعالم بدة يخلص من النووي وأحنا الي بكلف عندنا لتر مية  الشرب نص ليرة بدنا نعمل مفاعل سنة 2020 يعني لما يصير حق لتر المي 20 ليرة هذا اذا ما متنا من العطش قبل ال 2015  ومعروف ان المفاعلات بدها كميات هائلة من المي طب منين؟.
 
  وين النواب والاعيان وين وزير الطاقة  والحكومات  والاعلام والاحزاب والنقابات عن هالمصيبة عن هالكارثة ؟

اذا كانت القصة عمولات وكمشنات بنلم لمة وبنقوم بالواجب مهي ال 20 مليار مديونية على قبتنا وقفت على كمشنات  النووي ؟يعني   مشان واحد بدة عمولات ومناصب وتنفيعات وشمات هوا بدمر  بلد واهلة   وبيبيعهم اوهام ومصايب وهبل  وبيحملهم ديون فوق ديونهم . هم ناقصين بلاوي افزعوا يا اردنيين ولحقوا البلا قبل وقوعة ولا بعدين بنندم جميعا 

zoubinaji@hotmail.com