أضف إلى المفضلة
الجمعة , 29 آذار/مارس 2024
شريط الاخبار
“أتلانتيك”: لماذا بنيامين نتنياهو أسوأ رئيس وزراء لإسرائيل على الإطلاق؟ خطأ شائع في الاستحمام قد يضر بصحتك لافروف عن سيناريو "بوليتيكو" لعزل روسيا.. "ليحلموا.. ليس في الحلم ضرر" روسيا تستخدم "الفيتو" في مجلس الأمن ضد مشروع قرار أمريكي بشأن كوريا الشمالية الجمعة .. اجواء ربيعية وعدم استقرار جوي ضبط 69 متسولاً بإربد منذ بداية رمضان الخارجية تعزي بضحايا حادث حافلة ركاب في جنوب أفريقيا طلبة أردنيون يقاطعون مسابقة عالمية رفضا للتطبيع الأردن يرحب بقرار العدل الدولية الرامي لاتخاذ تدابير جديدة بحق إسرائيل البنك الدولي يجري تقييمًا لشبكة خطوط تغذية الحافلات سريعة التردد في الأردن العدل الدولية: تدابير تأمر إسرائيل بضمان دخول المساعدات لغزة إلزام بلدية الرصيفة بدفع اكثر من 15 مليون دينار لأحد المستثمرين 120 ألفا أدوا صلاتي العشاء والتراويح بالأقصى مصطفى يشكل الحكومة الفلسطينية الجديدة ويحتفظ بحقيبة الخارجية - اسماء الانتهاء من أعمال توسعة وإعادة تأهيل طريق "وادي تُقبل" في إربد
بحث
الجمعة , 29 آذار/مارس 2024


شو الموضوع ؟

بقلم : محمد عياش القرعان
15-11-2014 10:08 AM
صار معي اليوم مثل ما صار مع حسني البورزان بمسلسل (صح النوم) القديم،،لما كانوا يعرضوه برمضان ايام زمان بالسبعينيات ايام ما كان التلفزيون بالابيض والكحلي( طبعا تلفزيوننا كانت الوانه كحليه وكاحته بسبب الشمس مشان هيك الوانه كانت كاحته ) ايام لما كنا نتشعبط على اسوار الجيران مشان نتفرج على التلفزيون, اللي كانوا ايامها كل اهل الحاره يتعللوا في بيت واحد.. واحنا الزغار كانوا يكحشونا ،،
كان حسني البرزان ،،كل ما كان ينوي يكتب مقالته اليوميه وما ان يبدأ بكتابة جملة (اذا اردت ان تعرف ماذا في البرازيل فيجب عليك ان تعرف ماذا في الارجنتين)،،يطلعله غوار الطوشه ابو المقالب بمقلب شكل وغير متوقع ،،،مشان يشوش عليه وينرفزه وما يكتب المقال تبعه ،، ويظل على هالمنوال حتى تنتهي الحلقة وما يكتب مقاله،،
انا اليوم مثل اللي عنجد ..نزلت على شط الغندور من اجل هذه الغاية،،حيث البحر والهدوء والجو الرومنسي واشياء اخرى ،،ولسه ما قرمزت على الكرسي وطلّعت تلفوني وبدي اكتب واذا بالنادل بقول (تشرب حاجه يا بيه !!) قلت اه بشرب (سم يهريني) ،،قلت يا رجل هو انا لسه قعدت حتى تطلب مني ..طيب استنى شويه !!؟
قال معلش يا بيه براحتك !! فراحت ربع الفكره،،
وبعدها بشوي،،شغلوا مكبرات الصوت على اعلى صوت لمطرب ابصر من وين حايشينه،،قلت معلش بحط محارم بأذاني ومش مشكله المهم اكتب مقالي،،،بعد شوي بلشت بدي اكتب اول كلمة ،،طلعتلي بنت بتبيع علكة شعراوي شعرها مثل الخريس وأديها لو شفتوا اديها !! قالبات رمادي من كثرة الوسخ،،حكتلي مشان الله اشتري علكة،،،حكيتلها شكرا ما بغير علكتي ..انا ما بعلك الا علكة (بُطُم) اذا فيه معِك ما فيه مشكله ؟ قالت هاه اممممممممم، فُبهتت الشحاده من قولي وذهبت ،،،
المهم خلصنا منها بالعافيه،، قلت خلص انتهينا من الازعاجات،،بعدني بدي اكتب اول كلمة واذا واحد شايل كيس على ظهره فيه شعر البنات وبصيّح وطوله قد فرعون… قال تشتري شعر البنات.. قالت لا ما بحب غير شعر الاولاد… فتركني وراح،،وبعدني ما بلشت واذا بواحد ازعر صايع مش ملاقي حدا يكتله بدَن، سايق دراجه سكوتر وشكله أمّظي عمره وهو يسوق (اكديش) قبل ما ييجي هون على العقبة ،، واجا على العقبه وشاف اشي عمره ما شافه بحياته،،وصار يفعفط ويخمّس فيها ويطلّع صوت قوي وازعاج مش طبيعي وما حدا قدر يحكي معه ،،لا شرطه ولا غيره… ومقولة (ان حريتك تنتهي عندما تبدأ حرية الاخرين) مقولة خاطئة وتستطيع تطبيقها في كل مكان ،،وحتى في مزارع الجاج يمكن ان تطبقها وتجد احترام لحرية الاخرين الا بالاردن ،،
المهم خلصنا من هاظا السافل المايع ابو شاليش اللي سايق دراجه،، وبلشت بدي اكتب ،،والا اللي قاعدين بجنبي وحواليّ بلشوا يضحكوا ويصيحوا على طول صوتهم، ومعاهم اولاد شكل امهاتهم كاينات يتوحّمن على سعادين وقرود قبل ما يخلّفوهم ،وكل واحد منهم فاتح تلفونه على اغنية شكل،،والمهم حاولت جاهدا التغلب على كل هذه المعوقات ،، واذا بي احتاج للدخول للحمّام من كثرة ما شربت ميّه ساعتها وقد ما نشفوا ريقي الله ينشف ارياقهم،،،فالتفت يُمنة ويسرة ، فلم اجد اي حمّام بالقرب مني،،رغم انها المنطقة السياحية الاولى بالاردن والمنفس البحري الوحيد لنا الا انه لا يوجد مرافق تليق بالناس والمكان .... فتركت المكان وانقلعت غير آسفا …وانا اهمُّ بالانقلاع من مكاني واذا باحد المتسولين الطرشان معاه ورقه ثمنها قرشين وببيعها بليرة وأشّرلي فيها لاشتريها منه..فقلت بنفسي ما هوّ اليوم ما ظل غير انت ،مشان تكمل معي الليله ع آلاخر !!!!!!!.
واهلين هدوء واهلين سياحه !!!

بالمناسبة ، هوّا شو كان موضوع المقال تبعي اليوم ؟

التعليقات

1) تعليق بواسطة :
15-11-2014 12:49 PM

كيف تنشرون هكذا نصوص ؟!!!!

تنويه
تتم مراجعة كافة التعليقات ،وتنشر في حال الموافقة عليها فقط. ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن علما ان التعليقات تعبر عن أصحابها فقط .
الاسم :
البريد الالكتروني :
اظهار البريد الالكتروني
التعليق :
بقي لك 300 حرف
جميع الحقوق محفوظة © كل الاردن, 2012