|
|
|
الجمعة , 26 نيسان/أبريل 2024
مشروع مشروع
بقلم : احمد حسن الزعبي 21-10-2014 12:30 AM انطلاقاً من المثل الشهير «من استشار ما خاب»..فكّر أبو يحيى بمشروع «ينقّط» بـ»حلق الأولاد» بالإضافة إلى الراتب التقاعدي الذي لا يسمن ولا يغني من «كوع»..وضع يديه خلف ظهره وبدأ يتجول في السوق يخيط الطريق برجليه النحيلتين ،المحلات مزدحمة ، الحركة دؤوبة الأسواق بالمجمل ممتلئة بالمارين والمتسوقين...لمعة فكرة في رأس الحجي وعاد إلى البيت فرحاً ممكساً بالقلم والورقة...وبعد ان وضع حسبة تقريبية وتصوّر مبدأي..نادى أم العيال وقال لها بدون مقدّمات اسمعي يا مرة هيك من الباب للطاقة : بدي أفتح مطعم!... أم يحيى:مطعم؟؟ أبو يحيى: مطعم ،حمص،فول ،فلافل،سندويشات! أم يحيى: واذا تسممت الناس؟! ابو يحيى: شو هالفال؟؟ ام يحيى: كمان الحكومة نازلة «شمع» بهالمحلات عن جنب وطرف... ابو يحيى: بس رح يكون شغلي نظيف. أم يحيى: بالصيف الحمص ما لهوش روح..وبالشتوية الناس بتدبّ ع الزيتون والمقدوس.. حك الحجي رأسه من تحت الشماغ وبدأ يفكر..الحسابات التي كانت على الورق قبل قليل بدأت تتراجع وتنحسر، وغيمة التفاؤل التي ظللته من السوق الى البيت تحولت الى فقاعة صابون...اووووف لا بد من إعادة الدراسة من جديد... *** محل ملابس رجالية؟..قال ابو يحيى لــ»عديله»..اخذ الرجل نفساً عميقاً على الأرجيلة ثم سأله: شغلتك؟ أبو يحيى: لأ..بس بتعلم!!. عديله: مليون لون وموديل، وراح الصيفي اجا الشتوي..راح الشتوي..اجا الربيعي...وكل نمرة ولون الها 20 مقاس...الشغل على العيدين ..وطول السنة بــ»تكت» مصاريف من جيبتك...كمان لو دخل فار على المحل «بخرب لك نص البضاعة» و»بقرطلك» نص الجاكيتات... شو هالمشروع يا رجل.. *** محل «مي مفلترة»!!...ضحكة مجلجلة في الغرفة...»ابن تركية» معلقاً..»مية البير» أحسن من المفلتر 100 مرة..كمان الجالون بنصّ دينار قديش مربحك..قول قديش بدك تبيع لتغطي أيجار المحل والشغيل ..وبدها باص توزيع..معك حق باص؟؟؟؟.. *** مكتبة؟؟...هو حدا بيقرا ويكتب هالايام كله ع النت... محل بناشر؟ كل قديش وقديش تا تبنشر السيارة!!.. طيب قهوة وأراجيل...له يا رجل فيها شبهة حرام!!.. ابو يحيى هذه الأيام.. مواظب على جلسات دورية عند طبيب نفسي.. (الراي)
التعليقات
1) تعليق بواسطة :
21-10-2014 09:28 PM
 ههههههه ولا عمره بيفتح اي مشروع...
تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن
علما ان التعليقات تعبر عن أصحابها فقط .
|
|
جميع الحقوق محفوظة © كل الاردن, 2012
|
الرد على تعليق