|
|
|
الثلاثاء , 14 أيار/مايو 2024
فرخ البط «عوّاد»
بقلم : احمد حسن الزعبي 02-12-2012 12:59 AM كان استأذنا «أبو العبد» اذا ما مل من التدريس، أو وقف عاجزاً أمام حل مسألة معقدة هو كتبها بيده ، او اذا لم يتمكن من إيجاد الجذر التكعيبي لرقم من أربع خانات ..يهرب الى هوايته المفضّلة ،حيث يجلس على طرف المقعد الأمامي بزاوية 45 ويضع طرف العصا تحت لحيته ويبدأ بسؤالنا واحداً تلو الآخر.. - المعلم: خلدون شو حاب تصير؟ - خلدون: مهندس. - المعلم:شو أبوك بيشتغل؟ - خلدون: عنده «محل جاج»! - من ايدي اذا بتصير!! * * * ثم يسال الذي بعده.. -المعلم: ناصر ..شو بتحب تصير؟! - طيار ! - شو أبوك بيشتغل؟ - مصلّح صوبات!. - من ايدي اذا بتصير!! * * * - ها يا ابو خشوم .. شو حاب تصير؟ - رائد فضاء! - شو ابوك بيشتغل؟ - شوفير بكم. - من ايدي اذا بتصير !. * * * ثم يمد رقبته قليلاً ويرفع نظارته عن عينيه لينتقل بالسؤال الى آخر مقعد في الصف: - المعلم: ها عوّاد شو حاب تصير؟ - حاب أصير..زلمة! - المعلم: اف؟ بس «الزلمة» مش مهنة! - عواد: لأ مهنة! - المعلم: كيف مهنة! - عواد: انا بسمع امي كل يوم بتقول لأبوي نفسي تصير زلمة زي هالزلم ويكون إلك كلمة قدّام الناس!. - المعلّم: وما طلّقها بعده ؟ - عواد: لأ.! - المعلم: لعاد شو قال لها ؟؟!. - عواد: قال لها ..إنتي بس طوّلي بالك عليّ شوي والله غير أصير..! - المعلم: عوّاد.. اقعد وابشر بالخير عموه..اذا ابوك بصير انت بتصير! (الراي)
التعليقات
1) تعليق بواسطة :
02-12-2012 01:18 AM
 صحيح..............يا فهيم واللي بده يفهم يفهمها
2) تعليق بواسطة :
02-12-2012 08:03 AM
ههههههه ... على الاقل تفاءلوا بالخير تجدوه ،، وبعدين معلمكوا هذا ليش مِتخذ سياسة الاحباط خارطة طريق سيطرت على قناعاته .. محنا منعرف انه من الشوك بطلع ورد ..
3) تعليق بواسطة :
02-12-2012 09:36 AM
معلمنا كان يصنف أبناء المحافظة أربعة أصناف حسب مكان سكناهم : صنف حناتير " سواقين شاحنات " ، وصنف طباشير " معلمو مدارس " وصنف بشاكير " موظفو فنادق " وصنف بصاطير " عسكر " . وهذا صحيح لنسبة 60% . رحم الله معلمنا .
4) تعليق بواسطة :
02-12-2012 12:26 PM
بس الفيفا ما بتساوي زلم يت عواد
5) تعليق بواسطة :
02-12-2012 03:08 PM
يعني يا زعبي امه لعواد ما هيجنت على ابو عواد وقالت يا ابوعواد وش ولعك بيا يا شين يا قليل الوالي لو الي من جملتك ميه لصيح يا قلت رجالي يا قلت رجالك يا الاردن الله عليك يا زمن وصفي وهزاع اشتقنالك
6) تعليق بواسطة :
02-12-2012 11:18 PM
والله يا زعبي ضحكتني رغم ان الاكتئاب وصل عندي القمه .من الصبح وانا اطارد بالحرمه بمستشفيات الدوله وكل شغلهم مثل فسوة نسر فوف السحاب .المهم عند عودتي قرات الحكايه خاصتك وهي للعلم لا تمثل اي شعب بالعالم الا الاردني وتنطبق على 80 بالميه وليس 60 .الله يعطيك العافيه .
تنويه
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع كل الاردن بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع كل الاردن
علما ان التعليقات تعبر عن أصحابها فقط .
|
|
جميع الحقوق محفوظة © كل الاردن, 2012
|
الرد على تعليق